Studentët e Fakultetit Juridik u njohën me sistemin e mbrojtjes së Pronësisë Intelektuale në Kosovë
Prishtine,
24/04/2025
Në kuadër të ligjëratës së Prof. Ass. Dr. Luljeta Plakolli-Kasumi nga Katedra e së Drejtës Civile në Fakultetin Juridik të Universitetit të Prishtinës, sot u zhvillua një aktivitet informues me pjesëmarrjen e përfaqësuesve nga tri institucione kyçe në fushën e pronësisë intelektuale në Kosovë: Agjencia për Pronësi Industriale, Zyra për të Drejtat e Autorit, dhe Dogana e Kosovës.
Gjatë takimit, studentët patën mundësi të njihen nga afër me:
- Rolin dhe kompetencat e Agjencisë për Pronësi Industriale në mbrojtjen e markave tregtare, patentave dhe dizajneve industriale;
- Përgjegjësitë e Zyrës për të Drejtat e Autorit, me fokus të veçantë në të drejtën e autorit dhe sfidat që paraqiten në kontekstin e zhvillimeve teknologjike;
- Kontributin e Doganës së Kosovës në zbatimin e të drejtave të pronësisë intelektuale në kufi, përmes parandalimit të hyrjes së produkteve që shkelin këto të drejta.
Ky aktivitet u zhvillua me qëllim të fuqizimit të njohurive të studentëve në fushën e të drejtës së pronësisë intelektuale dhe rëndësisë së saj në sistemin juridik dhe ekonomik të vendit.
Diskutimet dhe ndërveprimet gjatë sesionit u vlerësuan lartë si nga studentët, ashtu edhe nga përfaqësuesit institucionalë, duke treguar edhe një herë rëndësinë e bashkëpunimit ndërmjet akademisë dhe institucioneve publike.
