Në kuadër të aktiviteteve për shënimin e Javës Botërore të Pronësisë Intelektuale 2026, U.d. Drejtor i Përgjithshëm i Agjencisë për Pronësi Industriale (API), mori pjesë si panelistë në The Brand & IP Forum 2026 eventi i parë i specializuar në pronësi intelektuale i organizuar nga sektori privat në Kosovë.
Evenimenti u mbajt më 23 Prill 2026 në Barabar Centre, Prishtinë, dhe u organizua nga firma ligjore RAMAJ & Associates L.L.C. Forumi mblodhi zyrtarë institucionalë, avokatë të specializuar, liderë të industrisë kreative dhe sipërmarrës, me qëllim krijimin e një hapësire profesionale për diskutim mbi mbrojtjen e markave tregtare dhe inovacionin ligjor.
Gjatë sesionit të panelit, Drejtori i Agjencisë prezantoi gjendjen aktuale të sistemit të markave tregtare në Kosovë, duke ndarë të dhëna mbi volumin e aplikimeve për periudhën 2024–2025 dhe sektorët dominues. Ai theksoi hapat konkretë që API po ndërmerr në kuadër të procesit të digjitalizimit të shërbimeve, duke përfshirë modernizimin e sistemeve të brendshme dhe forcimin e ndërveprimeve me bazat ndërkombëtare të të dhënave, si EUIPO dhe WIPO.
Një ndër pikat kryesore të diskutimit ishte rëndësia e monitorimit aktiv të buletineve zyrtare dhe ndërgjegjësimi i bizneseve mbi afatin 90-ditor të parashikuar nga Ligji nr. 08/L-075 për Marka Tregtare për ushtrimin e të drejtës së kundërshtimit, afat i cili shpesh kalon pa u vërejtur nga sipërmarrësit.
Agjencia vlerësoi iniciativën si kontribut konkret ndaj promovimit të kulturës IP në sektorin e biznesit, duke shprehur mbështetjen e API-së për bashkëpunimin publik-privat në fushën e pronësisë industriale.
Gjatë mbrëmjes u lansua zyrtarisht edhe platforma markatregtare.com, zgjidhja e parë teknologjike e zhvilluar në Kosovë për menaxhimin e markave tregtare, e cila komunikon drejtpërdrejt me regjistrat e API-së, Zvicrës dhe EUIPO-s.
Forumi shënoi hap pozitiv drejt krijimit të ekosistemit vendor të pronësisë intelektuale, duke plotësuar në mënyrë konkrete axhendën institucionale të API për ndërgjegjësim dhe modernizim të sistemit IP në Kosovë.
