Procedura e regjistrimit të Patentës

Si regjistrohet patenta?

Procedura për regjistrimin e patentës zhvillohet pranë Agjencisë për Pronësi Industriale (API) dhe përfshin hapat në vijim:

1. Paraqitja e aplikimit

Aplikimi për patentë duhet të përmbajë:

Formularin e plotësuar për dhënien e patentës;
Përshkrimin e qartë dhe të plotë të shpikjes;
Kërkesat patentore që përcaktojnë shtrirjen e mbrojtjes së kërkuar;
Vizatimet, kur përshkrimi ose kërkesat patentore u referohen atyre;
Përmbledhjen e shkurtër të shpikjes (abstraktin);
Dëshminë e pagesës së tarifës së aplikimit;
Autorizimin, nëse aplikimi paraqitet përmes përfaqësuesit;
Dokumentacionin për të drejtën e përparësisë, nëse kjo e drejtë kërkohet.

2. Shqyrtimi i aplikimit

API verifikon plotësimin e kërkesave formale dhe shqyrton kushtet ligjore për njohjen e patentës. Nëse konstatohen mangësi, aplikuesi njoftohet për plotësimin ose korrigjimin e tyre brenda afatit të caktuar.

3. Njohja, regjistrimi dhe publikimi i patentës

Nëse plotësohen kushtet ligjore dhe paguhen tarifat përkatëse, API nxjerr vendim për njohjen e patentës, e regjistron në Regjistrin e Patentave dhe e publikon në Buletinin Zyrtar.

Si rregull, vendimi për njohjen e patentës nxirret pas kalimit të 18 muajve nga data e paraqitjes së aplikimit ose nga data e përparësisë, nëse kjo e drejtë është kërkuar. Me kërkesë të aplikuesit, njohja dhe publikimi mund të bëhen më herët, sipas kushteve ligjore.

4. Pagesa e tarifave vjetore

Për ta mbajtur patentën në fuqi, pronari duhet të paguajë tarifat vjetore të mirëmbajtjes brenda afateve të përcaktuara.

5. Dorëzimi i dëshmisë së patentueshmërisë

Pronari duhet t’i dorëzojë API-së dëshminë e përcaktuar me ligj që shpikja i plotëson kushtet e patentueshmërisë, si rregull, deri në përfundimin e vitit të nëntë të afatit të patentës, të llogaritur nga data e paraqitjes së aplikimit.

Nëse procedura në zyrën përkatëse ende nuk ka përfunduar, pronari duhet ta njoftojë API-në brenda këtij afati, për zgjatjen e tij sipas kushteve ligjore.

Aplikacion për Regjistrimin e Patentës

UDHËZIM ADMINISTRATIV (MINT) – Nr. 14 – 2022 PËR PROCEDURAT E REGJISTRIMIT TË PATENTAVE

Doracak për Patenta

Libri me ilustrime për Patenta

Çfarë është patenta