Më 23 dhjetor, në ambientet e Agjencisë për Pronësi Industriale në Prishtinë, u mbajt një takim pune ndërinstitucional ndërmjet Agjencisë për Pronësi Industriale të Republikës së Kosovës dhe Drejtoria e Përgjithshme e Pronësisë Industriale të Republikës së Shqipërisë.
Takimi u hap me fjalë përshëndetëse nga u.d. Drejtori i Përgjithshëm i API-së dhe Drejtoresha e Komanduar e Përgjithshme e DPPI-së, pas së cilës u zhvillua një shkëmbim i detajuar i përvojave lidhur me raportet vjetore të punës, sfidat institucionale, praktikat e mira, si dhe zhvillimet aktuale në fushën e acquis të Bashkimit Evropian, me fokus të veçantë në kërkesat e Kapitullit 7 – Pronësia Intelektuale. Gjithashtu, u diskutua edhe roli i bashkëpunimit rajonal në kuadër të CEFTA-s dhe Nënkomitetit për Pronësinë Intelektuale.
Në kuadër të këtij aktiviteti, Enti Shtetëror për Pronësi Industriale i Republikës së Maqedonisë së Veriut mori pjesë në drekën zyrtare të organizuar nga Agjencia për Pronësi Industriale, e cila shërbeu si një mundësi për bashkëbisedim informal dhe forcim të komunikimit ndërinstitucional.
Takimi konfirmoi përkushtimin e institucioneve për thellimin e bashkëpunimit rajonal në fushën e pronësisë industriale, harmonizimin me standardet evropiane dhe avancimin e kapaciteteve institucionale në shërbim të inovacionit dhe zhvillimit ekonomik.
